Оралда сарбаздар жоғалған баланы тапты
14:41, 21 Сәуір 2017
ОРАЛ. ҚазАқпарат - Орал қаласында 5517-әскери бөлім жауынгерлері жоғалған төрт жасар баланы тапты, деп хабарлайды «ҚазАқпарат» тілшісі.
ҚР Ұлттық ұланы «Батыс» өңірлік қолбасшылығынан түскен мәліметке қарағанда, құрамында қатардағы жауынгерлер Серафим Ласица, Мұхамед Мағжан, Оразбек Жабай бар әскери топқа қала тұрғыны К.Жұмағазиева төрт жасар туысының жоғалғанын айтып, көмек сұрайды. Топ басшысы С.Ласица сол бойда кезекші, аға лейтенант Мұқат Абсатовқа хабарлап, өздері іздеуге шығады. 15 минуттан кейін аталған топ Құрманғазы көшесі бойынан адасып қалған баланы тауып, ата-анасы мен апасының қолына тапсырады.
Көрсеткен қырағылығы мен өз міндеттерін абыроймен орындағаны үшін аталған жауынгерлер 5517-әскери бөлім командирі тарапынан ынталандырылды.
Еске сала кетейік, бұдан бұрын Ұлттық ұлан жауынгерлері Жаңаөзен қаласында жоғалған бес жасар баланы тапқан болатын.