ОРАЛ. ҚазАқпарат – Оралда сорғы стансасында құбыр жарылып, екі жұмысшы кәріз суына батып кетті, деп хабарлайды ҚазАқпарат тілшісі.
БҚО денсаулық сақтау басқармасының баспасөз қызметінен мәлім еткеніндей, оқиға бүгін Исатай-Махамбет көшесіндегі 2-кәріздік сорғы стансасында болды.
«Жедел жәрдем сағат 11.11-де шақырылды. Кәріздік сорғы стансасындағы жөндеу жұмыстары кезінде шахтада құбыр жарылған. Соның салдарынан «Батыс су арнасы» ЖШС-ның 1971 және 1982 жылғы жұмысшылары оқиға орнында көз жұмды», - деп хабарлады ведомстводан.
Орал қаласы әкімінің баспасөз қызметі болған оқиғаны растап, қазіргі кезде тиісті органдардың жұмыстанып, қайғылы жағдайдың мән-жайы анықталып жатқанын жеткізді.
Қазіргі кезде 2-кәріздік сорғы стансасындағы апат салдарынан Орал қаласының орталық бөлігінде және Зачаган кентінде су жоқ. Қалпына келтіру жұмыстары жүргізілуде.
Еске сала кетейік, бұдан бұрын БҚО-да бір күнде жол апатынан үш адамның ауруханаға түскенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).