ОРАЛ. KAZINFORM – Биылғы су тасқынынан зардап шеккен Орал қаласының тұрғыны, екінші топтағы мүгедек өтемақыны сот арқылы өндіріп алды.
БҚО сотынан түскен мәліметке қарағанда, аталған азамат өтемақыны төлеу үшін қала әкімдігіне жүгінген. Бүлінген мүлікті комиссия 716 205 теңге деп бағалаған. Алайда 104 500 теңге ғана төленген. Мұнымен келіспеген М. бірнеше рет қала мен облыс әкімдігіне жүгінген. Тиісті жауап алмаған соң БҚО мамандандырылған ауданаралық әкімшілік сотына талап арыз түсірген.
«Алдын ала тыңдау барысында тараптарға татуласу туралы келісім ұсынылған. Келісім шартына сәйкес талап қоюшы даулау туралы талаптан бас тартты. Ал жауапкер екі бағалаушы компанияның қателігін назарға ала отырып, бір ай мерзім ішінде талап қоюшының есепшотына 449 300 теңге көлемінде материалдық залал қосымша ақысын аударуға міндеттенді. Нәтижесінде дау қос тарап үшін де оңтайлы шешілді», - деп хабарлады ведомстводан.
Еске сала кетейік, бұдан бұрын Батыс Қазақстанда үйі суға кеткен тұрғынның құқығын сотта қорғап шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).