ОРАЛ. KAZINFORM — Орал қаласында су тасқыны кезінде салынған бөгет үйінділерін жинау, аумақты ретке келтіру жұмысы жүргізіліп жатыр.
Орал қаласы әкімдігінен мәлім еткендей, қазіргі кезде Шаған өзені бойындағы бөгет үйінділері, құм салынған қапшықтар жиналуда.
«Бұған аумақтық қорғаныс қызметкерлері жұмылдырылды. Аталған жұмысқа күн сайын 10 арнайы техника тартылған. Алдағы уақытта қаланың өзге де аудандарында осындай тазалық жұмысы жүргізілмек» деп хабарлады ведомстводан.
Қалада күні бүгін су басқан саяжай үйлерін техникалық тексеруден өткізу, мүліктік бағалау жұмыстары жалғасып жатыр.
Оралдағы эвакуация пунктерінде 2 мыңдай адам тұрып жатыр.
БҚО ТЖ департаментінің баспасөз қызметінен түскен мәліметке қарағанда, саяжайдан су сору жұмыстары тәулік бойы жүргізілуде.
Еске сала кетейік, бұдан бұрын Оралда суға кеткен 2600-ден астам тұрғын үйге техникалық тексеру жұмыстары жүргізілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).