ОРАЛ. ҚазАқпарат - Орал қаласында тағы бір апатты тұрғын үйді бұзу жұмыстары басталды, деп хабарлайды «ҚазАқпарат» тілшісі.
Қала әкімдігінен түскен мәліметке қарағанда, қазіргі кезде бұзылып жатқан Ғ.Құрманғалиев көшесі, 3-үй тұрғындары мемлекеттік-жекешелік әріптестік аясындағы бағдарламаға қатысып, жаңадан салынған көп қабатты үйге көшірілді. Апатты мекеннің орнына «Орал Полимер» ЖШС жаңадан бес қабатты үйді тұрғызады. Инженерлік желілерді тарту және абаттандыру жұмыстары мемлекет есебінен жүргізіледі.
Облыс әкімі Алтай Көлгіновтің айтуынша, өңірде апатты және әбден тозған үйлер саны 200-ден асады. Соның 43-і - апатты үйлер. Соңғы үш жылда 7 үй бұзылып, 4 үй жаңадан салынды. Деповская көшесіндегі 90 пәтерлік алғашқы үй өткен жылы күзде пайдалануға берілді. Қалған үш үй құрылысы биыл мәреге жетеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).