ОРАЛ. ҚазАқпарат - Орал қаласында №31 мектеп ғимараты қайта салынбақ, деп хабарлайды «ҚазАқпарат» тілшісі.
Облыстық құрылыс басқармасынан түскен мәліметке қарағанда, апатты жағдайдағы мектеп үйі сүріліп тасталып, орнына 400 орындық жаңа ғимарат салынбақшы. Қазіргі кезде оның жобалық-сметалық құжаттамасын жасау үшін облыстық бюджеттен 18 млн теңге бөлінді. Жаңа мектеп құрылысы 2019 жылы басталмақшы.
Қазір білім ордасында 400-дей бала оқиды. Олар жаңа ғимарат салынған кезде басқа мектепте білім ала тұратын болады.
Оралда бұдан бұрын апатты жағдайдағы №4 орта мектеп ғимараты сүріліп тасталып, орнына жаңасы салынып, өткен жыл соңында пайдалануға берілген болатын. №4 жалпы орта және қосымша білім беру мектеп-орталығының директоры Мәулен Ділмағамбетовтің сөзіне қарағанда, 8 қаңтар күні балалар үшінші тоқсанды жаңа ғимаратта бастайды. Мұнда 333 оқушы білім алады.
Айта кетейік, биыл облыс бойынша 4 жаңа мектеп құрылысы мәреге жетпекші.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).