Оралда тоғыз айлық сәби эскалатордан құлап кетті
00:07, 14 Наурыз 2022
ОРАЛ. ҚазАқпарат – Оралда тоғыз айлық қыз эскалатордан құлап кетті, деп хабарлайды ҚазАқпарат тілшісі.
БҚО полиция департаментінің баспасөз қызметі мәлім еткеніндей, оқиға 13 наурыз күні «Жеңіс» шағынауданы 3-үйде орналасқан «Азия Молл» сауда ойын-сауық орталығында болды.
Эскалаторда бірінші және екінші қабаттың арасында кетіп бара жатқан кезде 1987 жылғы анасының қолынан кішкентай қыз құлап кеткен.
Шамамен сағат 14.23-те 9 айлық қыз қалалық көпбейінді ауруханаға жеткізілді.
Аталған дерек Орал қаласы полиция басқармасында тіркеліп, тексеріс жүргізілуде.
БҚО денсаулық сақтау басқармасының баспасөз қызметі нақтылағанындай, қыздың жағдайы өте ауыр. Қазір жансақтау бөлімінде.