ОРАЛ. ҚазАқпарат – Оралда төтенше жағдай режимін бұзған кафе иесіне айыппұл салынды, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, құқықбұзушылық 18 наурыз күні түнгі рейдтік шаралар кезінде анықталды.
Төтенше жағдай талабына сәйкес түнгі 22.00-ден кейін жұмысын тоқтатуы тиіс болса да, «Тенгри» кафесінде (иесі 1984 жылғы азамат) адамдардың көңіл көтеріп отырғаны анықталды.
Кафе иесіне қатысты Орал қаласы полиция басқармасының қызметкерлері ҚР Әкімшілік құқықбұзушылық кодексі 476-бабына сәйкес (төтенше жағдай режимін бұзғаны үшін) әкімшілік хаттама толтырылды.
Орал қаласы мамандандырылған әкімшілік сотының шешімімен кафе иесі әкімшілік жауапкершілікке тартылып, оған 10 АЕК көлемінде айыппұл салынды.
Бұл – төтенше жағдай режимін бұзу бойынша өңірдегі бірінші дерек.
Еске сала кетейік, бұдан бұрын БҚО-да коронавирус тіркелді деген жалған ақпараттың таралғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).