ОРАЛ. ҚазАқпарат - Оралда автокөлік, гаражға қоса тұрғын үй өртеніп кетті, деп хабарлайды ҚазАқпарат тілшісі.
БҚО Төтенше жағдайлар департаментінің баспасөз қызметінен түскен мәліметке қарағанда, оқиға бүгін сағат 11.23-те Лермонтов көшесі, 42 мекенжайында болды.
Алдымен, үйдің жанындағы гаражда тұрған «ВАЗ-2114» автокөлігі жанған. Одан гараж, сосын үй отқа оранды.
Жалын шарпыған аумақ 100 шаршы метрді құрады.
Өрт сөндірушілердің күшімен 6 оттегі баллоны сыртқа шығарылды. «Тілсіз жау» сағат 12.17-де оқшауланып, 12.50-де ауыздықталды. Өртті сөндіруге 28 қызметкер, 7 техника жұмылдырылды.
Зардап шеккендер жоқ.
Еске сала кетейік, бұдан бұрын Оралда тұрғын үй өртеніп, бір адамның ауруханаға жеткізілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).