Оралда тұрғын үй отқа оранды

ОРАЛ. ҚазАқпарат – Оралда тұрғын үй отқа оранды, деп хабарлайды ҚазАқпарат тілшісі.

БҚО ТЖ департаментінің баспасөз қызметінен түскен мәліметке қарағанда, оқиға кеше сағат 05.35-те Л.Толстой көшесі 143-мекенжайында орын алды.

Салынып жатқан көппәтерлік үй аумағында орналасқан жеке тұрғын үйдің төбесі, жеке заттар мен мүліктер жанған. Өрт аумағы 40 шаршы метрді қамтыды.

«Тілсіз жауды» ауыздықтауға 9 адам, 3 техника жұмылдырылды.

Өрт 06.17-де оқшауланып, 06.49-да сөндірілді.

Зардап шеккендер жоқ.

Қазіргі кезде өрттің шығу себебі, кінәлі адамдар, келтірілген шығын анықталу үстінде.