ОРАЛ. ҚазАқпарат - Оралға қарасты Зачаган кенті маңындағы тұрмыстық қатты қалдықтар полигоны үшінші күн қатарынан жанып жатыр, деп хабарлайды ҚазАқпарат тілшісі.
БҚО ТЖ департаментінің баспасөз хатшысы Нұргүл Мұқанованың айтуынша, полигонда қалдықтардың жанып жатқаны жөнінде хабар 27 мамыр күні таңғы сағат 06.10-да түскен болатын.
Сол күні өрт сөндіруге жеке құрамнан 4 адам, 2 техника жұмылдырылды. Сонымен қатар «Жайық таза қала» ЖШС-дан 4 техника қатысты. Дегенмен 28 мамыр күні сағат 08.29-да полигонның қайта жанып жатқаны белгілі болды. «Тілсіз жауды» ауыздықтауға жеке құрамнан 5 адам, 1 техника қатысып, өрт сағат 17.40-та сөндірілді.
«Полигон бүгін де жанып жатыр. Қазіргі кезде өрт сөндірушілер сонда жүр. Техникалар мен адамдардың саны нақтылануда. Жалпы, полигонда қалдықтардың жануы жыл сайын қайталанады», деді «ҚазАқпарат» тілшісіне Н.Мұқанова.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).