ОРАЛ. 15 қараша. ҚазАқпарат - Батыс Қазақстан облыстық қазақ драма театрында ұлттық валюта - теңгенің 20 жылдығына орай салтанатты жиын өткізілді.
Қаржы саласының қызметкерлерін өңір басшысы атынан облыс әкімінің бірінші орынбасары Серік Шәпкенов құттықтап, алғысхатпен марапаттады. Оның атап өткеніндей, осыдан 20 жыл бұрын Елбасымыз Н.Назарбаев ұлттық ақша шығарып, айналымға енгізу жөнінде көрегендік шешім қабылдап, елді ықтимал күрделі ахуалдан сақтап қалды. Сонан бері еліміз өтпелі кезеңнің талай қиындығын бастан өткерсе де, теңгенің тұрақтылығы сақталып, экономика қалыпты дамып келеді.
ҚР Ұлттық банкі облыстық филиалы директорының міндетін уақытша атқарушы Ғалия Сатыбалдина шағын хабарлама жасап, мерекеге орай бір топ қаржыгерді марапаттап, сый-сияпат көрсетті. Мерекелік шарада банк саласы қызметкерлерінің балалары мен немерелерінен құрылған «Банк-шоу» ансамблі өнер көрсетті. Жиналғандарға теңгенің 15 жылдық мерейтойына арналған деректі бейнетаспа көрсетілді. Шара соңы мерекелік концертке ұласты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).