ОРАЛ. 12 қазан. ҚазАқпарат - БҚО кәмелетке толмағандар ісі жөніндегі мамандандырылған ауданаралық соты бұзақылық әрекетке барған ұлы үшін анасына айыппұл салды.
Облыстық соттың баспасөз қызметінен түскен мәліметке қарағанда, оқиға Орал қаласы мектептерінің бірінде орын алған. Оқушы сабақ кезінде сыныптастарымен қатты сөйлесіп, мұғалімнің сөзін тыңдамаған. Оның тәртібі туралы жазып беру үшін күнделігін сұраған кезде де бермеген. Ал мұғалім сырт айналған кезде саусағымен дөрекі қылыққа барған. Оқушы тек екі күннен кейін ғана кешірім сұраған.
Өзін кемітті деп санаған мұғалім оқушыға шара қолдану жөнінде арыз берген. Сот отырысында ол кінәсін толық мойындап, түзелуге уәде берді.
Сот қаулысымен аталған жасөспірім ҚР Әкімшілік құқықбұзушылық кодексі 331-бабына сәйкес ұсақ бұзақылық белгілері бойынша айыпты деп табылды. Оның жасы 16-ға жетпегендіктен, анасына 5 АЕК көлемінде (8655 теңге) айыппұл салынды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).