ОРАЛ. ҚазАқпарат - Кеше Оралда қос қабатты үйдің шатырынан секірмек болған қыз құтқарылды, деп хабарлайды «ҚазАқпарат» тілшісі.
БҚО Төтенше жағдайлар департаменті жедел құтқару жасағынан түскен мәліметке қарағанда, құтқарушылар оқиға орнына санаулы минуттар ішінде жетіп, алдын ала батут әзірлеген. Аумақты қоршауға алып, жоспар құрған. Бас құтқарушы Рустам Ғұбашев жоғары баспалдақпен көтеріліп, ешкімді өзіне жақындатпай, секірмек болған қызбен сөйлескен. Жеңіл киінген қызға күртесін беріп, әңгімеге тартқан. Р.Ғұбашев оны райынан қайтармақ болып, жарты сағат тілдескен. Кейін қолайлы сәтті пайдаланып, шатырға тез шығып, мықтап ұстап алған. Қыз айтқанынан қайтпай, бұлқынғанымен, әріптестері көмекке жетіп, арнайы құрылғының көмегімен жерге түсірген. Содан кейін оны дәрігерлер мен құқық қорғау органдарына тапсырған.
Құтқарушылардың сөзіне қарағанда, мұндай жағдай бірінші рет кездесіп отырған жоқ. Жыл сайын ондаған адамға осындай шұғыл көмек көрсетуге тура келеді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).