ОРАЛ. ҚазАқпарат - Облыстық окнологиялық диспансерде «Үздік дәрігерге дейінгі кабинет» байқауының жеңімпаз-жүлдегерлері анықталды, деп хабарлайды «ҚазАқпарат» тілшісі.
Аталған байқау дәрігерге дейінгі кабинеттерде сапалы медициналық қызмет көрсетушілерді ынталандыру, қазіргі заманғы талаптарға толық сай келетін медбикелерді даярлауға назар аудару, олардың біліктілігін арттыру мақсатында ұйымдастырылды. Мұндай кабинетте орта буын медицина қызметкері жұмыс жасайтыны белгілі. Облыстық онкологиялық диспансер басшысының орынбасары Нұрлан Төлемісовтің айтуынша, медбике алғашқы қан талдауларына қарап-ақ ауру белгілерін дәл ажырата білуі тиіс. Соның ішінде қатерлі ісік аурулары неғұрлым ерте анықталса, емдеу соғұрлым нәтижелі болмақ.
Сайысқа қатысушылар алдымен өздерін таныстырып, содан кейін нақты іс үстінде сынға түсті. Байқау қорытындысында «Медицина орталығы» ЖШС медбикесі Ақбота Хамидуллина бірінші, №4 қалалық емханадан келген Нелля Ургарчева екінші, №5 қалалық емханадан Алтынгүл Қалиева үшінші орынды иеленді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).