ОРАЛ. ҚазАқпарат – Оралда волейболдан 2003-2004 жылғы жасөспірім қыздар және 2005-2006 жылғы ұлдар арасында ҚР қысқы чемпионаты мәреге жетті, деп хабарлайды ҚазАқпарат тілшісі.
Турнир волейбол спортын одан әрі дамыту және мықты жасөспірімдерді ұлттық құрамаға іріктеу мақсатында ұйымдастырылды.
Жарысқа Нұр-Сұлтан, Шымкент қалалары, Алматы, Ақтөбе, Атырау, Жамбыл, Қарағанды, Қостанай, Қызылорда, Павлодар, Түркістан, Шығыс Қазақстан және Батыс Қазақстан облыстарының командалары қатысып, бақ сынады. Оралға барлығы 300-дей жасөспірім волейболшылар жиналды.
Чемпионат қорытындысында қыздар арасында «Қостанай» командасы жеңімпаз атанды. «Жетісу» мен «Екібастұз» екінші-үшінші орындарды бөлісті. «Екібастұзбен» тартысты кездесуде 2:3 есебімен ұтылған оралдықтар төртінші орынды қанағат тұтты.
Ұлдар арасында қызылордалықтар чемпиондық атақты жеңіп алды. Жамбыл екінші, Алматы облысы үшінші орынға ие болды. Сондай-ақ үздік ойыншылар да марапатталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).