ОРАЛ. ҚазАқпарат - ҚР Тәуелсіздігінің 25 жылдығына орай Орал қаласындағы 5-шағынауданда тоғыз қабатты тұрғын үй пайдалануға берілді, деп хабарлайды ҚазАқпарат тілшісі.
Оның ашылу салтанатына қатысқан облыс әкімі Алтай Көлгіновтің атап өткеніндей, өңірде тұрғын үй құрылысы қарқынды жүргізілуде. Биылғы мерекелі жылы облыс көлемінде 1500 отбасы жаңа қонысқа көшуде. Облыс орталығында көп қабатты тұрғын үйлер іске қосылып жатса, соның бірі «Тұрғынүйқұрылысжинақбанкі» АҚ мен прокуратура арасындағы келісімге сәйкес беріліп отыр. «Альтаир» ЖШС салған аталмыш тұрғын үйде 72 пәтер болса, соның 47-сіне прокуратура қызметкерлері қоныстанбақшы. Осының бәрі Елбасы тапсырмасына сәйкес жүзеге асырылуда.
Жаңа қоныс иелерін облыс прокуроры Сапарбек Нұрпейісов те құттықтады.
Тұрғындарға пәтер кілттерін табыс еткен өңір басшысы прокуратура қызметкері Наталья Колпакованың үйіне кіріп, құтты болсын айтып, көрімдікке теледидар сыйлады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).