ОРАЛ. ҚазАқпарат - Бүгін облыс әкімі Алтай Көлгінов «Жастар» стадионында жасанды мұз айдыны құрылысымен барысымен танысты, деп хабарлайды «ҚазАқпарат» тілшісі.
Қазіргі таңда стадионда құрылыс жұмыстары аяқталып, абаттандыру ғана қалған.
Мұздатқыш жабдықтары, су дайындау, құю жүйесі толықтай орнатылған. Мұндағы құйылған мұз күн 10 градусқа дейін жылынғанда да ерімейді. Сондықтан допты хоккей шеберлерінің қыс өз алдына, көктем мен күз мезгілінде де барынша ұзақ дайындалуына, кездесулер өткізуіне мүмкіндік береді.
Сонымен қатар стадион мұз айдынын тегістейтін соңғы үлгідегі техникалармен, қардан тазартатын машиналармен жабдықталған.
Айта кетейік, жасанды мұз айдыны «ҚПО б.в.» компаниясының қаржысына салынды. Бұл Қазақстандағы допты хоккейге арналған алғашқы жасанды мұз айдыны болмақ. Қазіргі кезде допты хоккейден жоғары лига командалары арасында бүкілресейлік жарыста өнер көрсететін Оралдың «Ақжайығы» өз ойындарын уақытша «Стеновик» стадионында өткізуде. Жасанды мұз айдыны іске қосылғаннан кейін мұнда допты хоккейден Қазақстан құрамасы да жаттыға алады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).