ОРАЛ. ҚазАқпарат - Орал қаласында жасөспірімдер арасында велосипед спортынан Қазақстан біріншілігі өтуде, деп хабарлайды «ҚазАқпарат» тілшісі.
БҚО дене шынықтыру және спорт басқармасынан түскен мәліметке қарағанда, еліміз тәуелсіздік алғаннан бергі кезеңде мұндай деңгейдегі чемпионат Оралда алғаш рет ұйымдастырылып отыр. Бұл Батыс Қазақстанда велосипед спортының қарқынды дамуына септесетін болады.
П.Атоян атындағы стадионда салтанатты түрде ашылған жарысқа Қазақстан өңірлері мен қалаларынан жасөспірімдер арасындағы ең мықты спортшылар келді. Олар жекелей және командалық сында, топтық және айналмалы бәсекеде сынға түседі.
Велосипед спортынан Қазақстан мемлекеттік жаттықтырушысы Жетес Сүлейменовтің сөзіне қарағанда, бес күнге созылатын біріншілік қорытындысына сәйкес ұлттық құрама жасақталады. Олар алдағы уақытта Азия және әлем чемпионаттарында ел намысын қорғайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).