ОРАЛ. KAZINFORM – Орал қаласында халықаралық маңызы бар Ақтөбе-Орал-РФ шекарасы жолының 254-262 шақырымында орналасқан Жайық өзенінен өтетін көпір орташа жөндеуден өтті.
«ҚазАвтоЖол» ҰК» АҚ БҚО филиалының директоры Асылбек Марданның мәлім еткеніндей, бүгіннен бастап көпір көлік қозғалысы үшін ашылды. Оның сөзіне қарағанда, деформацияланған жіктер ауыстырылып, жол жабыны жаңартылды.
– Жоба құны – 1,2 млрд теңге. Қазіргі таңда көпірде қосымша жұмыстар атқарылып жатыр. Атап айтқанда, жол белгілері орнатылып, жиектер абаттандырылуда, - деді А.Мардан.
Аталмыш көпірді жөндеу жұмыстары 17 тамызда басталып, бастапқыда 1 тамызға дейін жабу көзделген еді. Кейін ол 5 тамызға дейін ұзартылды. Осыған дейін көліктер Меловые горки (Бортау) жағындағы айналма жол арқылы қатынап келді.
Еске сала кетейік, бұдан бұрын Оралда Жайық өзеніндегі көпір екі аптаға жабылатынын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).