ОРАЛ. ҚазАқпарат – Тәуелсіздік күніне және ұлы ақынның 175 жылдығына орай Оралда РУ-170/2 мекемесінде жазасын өтеушілер арасында Абай оқулары өткізілді, деп хабарлайды ҚазАқпарат тілшісі.
БҚО бойынша қылмыстық-атқару жүйесі департаментінің баспасөз қызметі мәлім еткеніндей, іс-шараға 8 жазасын өтеуші қатысып, бақ сынады.
Байқау Абай мұрасын оқып-үйрену, мемлекеттік тілдің мәртебесін көтеру, қазақ мәдениеті мен әдебиетін кеңінен насихаттау мақсатында ұйымдастырылды.
Алдымен Абайдың туындыларынан кітап көрмесі ұсынылып, ұлы ақынның өмірі мен шығармашылығы туралы бейнеролик көрсетілді.
Мекеме бастығының тәрбие жұмыстары жөніндегі орынбасары Бөкенбай Кәкімовтің айтуынша, байқау үш кезеңнен тұрды. Қатысушылардың өнерін арнайы қазылар алқасының мүшелері бағалады. Оларға Абайдың туындылары мен өмірінен сауалдар қойылып, орындаушылық шеберліктері, жанр әртүрлілігі сарапқа салынды.
Байқау жүлдегерлері ескерткіш дипломдармен марапатталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).