ОРАЛ. ҚазАқпарат - Бұқаралық ақпарат құралдарында жарияланған Ә.Көшекбаеваның ҚР Президенті атына жолдаған бейнешағымына қатысты Оралдағы РУ-170/2 мекемесінде тексеру жүргізілуде, деп хабарлайды «ҚазАқпарат» ХАА тілшісі.
БҚО прокуратурасының баспасөз қызметінен түскен мәліметке қарағанда, Ә.Көшекбаева ҚР ҚК 179-бабы 3-бөлімі «в» тармағына сәйкес, яғни ірі көлемдегі мүлікті ұрлау мақсатында қарақшылық жасағаны үшін жалпы тәртіптегі түзету мекемесінде 9 жыл жазасын өтеуге Тараз қалалық №2 сотының 2014 жылғы 8 қыркүйектегі үкімімен сотталған ұлы, 1988 жылғы Жеңіс Көшекбаевқа қатысты заңға қайшы әрекет жасағаны үшін аталмыш колония қызметкерлерін қылмыстық жауапкершілікке тартуды өтінген.
Осыған байланысты облыс прокурорының өкімімен шағымда көрсетілген дәйектерді тексеретін топ құрылды. Қазіргі кезде облыс прокуратурасының арнайы прокурорлары «Адам құқықтары мен заңдылықтың сақталуы жөніндегі қазақстандық халықаралық бюро» филиалының директоры Павел Кочетковтың қатысуымен сотқа дейінгі тексеруді жүргізуде.
Сотқа дейінгі тергеп-тексеру барысында Ә.Көшекбаева мен оның ұлы мәлімдеген барлық дәйектер мұқият тексеріліп, құқықтық баға берілетін болады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).