ОРАЛ. ҚазАқпарат - Оралда Ұлттық ұлан жауынгерлері иісшіл иттің көмегімен жоғалған бес жасар баланы тапты, деп хабарлайды ҚазАқпарат тілшісі.
«Батыс» өңірлік қолбасшылығының баспасөз қызметінен түскен мәліметке қарағанда, оқиға 31 қаңтар күні кешкі сағат 18.30 шамасында болды.
Орал қаласының тұрғыны үй жанында ойнап жүрген баласының жоғалып кеткені жөнінде айтып, Ұлттық ұлан жауынгерлерінен көмек сұрайды. Сол бойда барлық қызметтерге хабар беріледі.
Бұл кезде құрамында сержант Эльдар Жұмагелдин, қатардағы жауынгерлер Даниил Челнаков, Айбек Абдулаев жәнекинолог маман Салауат Янсуфин бар топ «Кармэн» атты итпен бала жоғалған «Солтүстік-шығыс» шағын ауданында жүр еді. Туысқандары берген баланың киімін кинолог итке иіскетіп, іздеу жөнінде тапсыпма береді. Ақыры ізге түскен ит Асан Тайманов атындағы №34 мектеп-гимназияның ауласына алып келеді. Сол жерде жауынгерлер жылап жүрген баланы көріп, кейін ата-анасына аман-есен тапсырады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).