ОРАЛ. ҚазАқпарат – Оралда жоғалып кеткен 9 жасар бала аман-есен табылды, деп хабарлайды ҚазАқпарат тілшісі.
БҚО полиция департаментінің ресми өкілі Болатбек Белгібеков мәлім еткендей, баланың жоғалып кеткені жөнінде хабар кеше сағат 20.17-де түскен.
Жедел іздестіру шаралары барысында патрульдік полиция батальонының взвод командирі, полиция аға лейтенанты Мербол Жанғалиев баланы сағат 21.13-те аман-есен тауып алды.
Баланың анасы Нұргүл Сисенованың сөзіне қарағанда, ұлы сағат 13.00-де өздері тұратын Зачаган кентінен қаланың екінші шетіндегі Мәскеу көшесі бойында орналасқан оқушылар сарайында орналасқан Д.Елеусінов атындағы бокс мектебіне кеткен.
Жаттығудан сағат 17.00-де шыққаннан кейін үйіне оралмаған. Өздері жан-жаққа хабар салып, іздегенмен, таба алмағаннан кейін полицияға жүгінген.
Баланың ата-анасы ұлдарын бір сағатқа жеткізбей тапқан полиция қызметкеріне алғысын жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).