ОРАЛ. ҚазАқпарат - Оралда Қазақстанның жоғары оқу орындарының студенттері арасында географиядан VІІ республикалық пәндік олимпиада өтуде.
Аталмыш білім сайысына Алматы, Петропавл, Шымкент, Ақтөбе, Тараз, Павлодар, Қарағанды, Көкшетау, Семей, Қызылорда және Орал қалаларынан барлығы 19 студенттік команда қатысып, бақ сынауда.
Республикалық олимпиада үш турдан тұрады. Бірінші, екінші турда қатысушылардың жалпы жертану, материктер мен мұхиттар географиясынан білімдерін сарапқа салынды. Сондай-ақ шет елдердің экономикалық, әлеуметтік және саяси географияларын, геоморфология мен гидрологияны қаншалықты білетіні тексерілді. Үшінші турда болашақ географтар Қазақстанның топографиясы, физикалық және экономикалық географиясы негізінде картография бойынша тәжірибелік тапсырмалар орындайды.
М.Өтемісов атындағы БҚМУ ректоры Асхат Иманғалиевтің айтуынша, студенттердің шығармашылық қабілеті мен білім-білігін шыңдай түсу үшін мұндай сайыстардың маңызы зор. Ең бастысы, бұл олардың болашақта бәсекеге қабілетті маман болып қалыптасуына септеседі.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).