ОРАЛ. ҚазАқпарат – Орал қаласында тұрғын мас күйінде «Kaspi Pay» терминалын ұрлап алып, сатып жіберген, деп хабарлайды ҚазАқпарат тілшісі.
БҚО полиция департаментінің баспасөз қызметінен мәлім еткеніндей, қаладағы дүкендердің бірінде белгісіз біреу төлем қабылдайтын кассада жатқан «Kaspi Pay» терминалын білдіртпей жымқырып кеткен. Оның бұл әрекеті бейнебақылау камерасына түсіп қалған.
«Жедел іздестіру іс-шаралары барысында 1983 жылғы қала тұрғыны анықталып, ұсталды. Тексеру барысында оның бұдан бұрын да қылмыстық жауапкершілікке тартылғаны белгілі болды. Күдікті терминалды төмен бағамен сатып жіберген. Ол қылмысты жасаған кезде мас күйінде болған. Аталған дерек бойынша ҚР ҚК 188-бабы 1-бөлігіне (ұрлық) сәйкес сотқа дейінгі тергеу амалдары жүргізілуде», деп хабарлады ведомстводан.
Еске сала кетейік, бұдан бұрын оралдық тұрғынның Арменияда ұрланған автокөлікті заңдастырғысы келгенін жазған болатынбыз.
Видео – БҚО полиция департаменті
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).