ОРАЛ. Қыркүйектің 5-і. ҚазАқпарат /Ғайсағали Ералы/ - Оралдықтар бүгін жалпықалалық сенбілікке шықты,
деп хабарлайды ҚазАқпарат тілшісі.
Қалада қыркүйектің 1-і мен қазанның 1-і аралығында санитарлық тазалық және абаттандыру айлығы жарияланған болатын. Сенбілік кезінде қаладағы мекеме-кәсіпорындар, оқу орындары өздеріне бекітілген аумақтарды тазартуға жұмылды. Күл-қоқыс, тұрмыстық қалдықтарды тасу үшін арнайы көліктер ұйымдастырылды.
Сенбіліктер сондай-ақ қыркүйектің 12-сі мен 26-сында да өткізілмек.
Биылғы тазалық айлығы қыркүйектің 19-ына белгіленген қала күніне байланысты жарияланып отыр.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).