Оралдың екі тұрғыны ірі көлемде героин тасымалдағаны үшін ұсталды
11:52, 14 Ақпан 2013
АҚТӨБЕ. 14 ақпан. ҚазАқпарат - Ақтөбеде Оралдан келген екі есірткі сатушы ірі көлемде героинмен ұсталды.
Полицейлер есірткі сатушыларды Ақтөбе қаласының вокзалында жедел ақпарат бойынша ұстады. 34 және 58 жастағы ер адамдар, Оралдың тұрғындары «Алматы-Ақтөбе» жолаушылар пойызымен келген.
Дәрігер-проктологтың қатысуымен оларды тінту кезінде ұнтақ тәріздес зат оралған 5 контейнер табылды. Сараптамаға сәйкес, тәркіленген зат 128 грамм салмақтағы героин болып шықты.
Қазіргі уақытта есірткіні жеткізу және сату арнасы анықталуда.
Онымен бірге ҚР ҚК-нің 259 бабы бойынша қылмыстық іс қозғалды. Күдіктілер қамауға алынды.
Жыл басынан ІІД есірткіге қарсы басқармасының қызметкерлері 1,5 келіден астам есірткі заты тәркілеп, 17 есірткі қылмысын тіркеді.