Шара ұйымдастырушылары - ҚР Қорғаныс министрлігінің «Қазақстан ГИС орталығы» АҚ және «Кибершабуылды талдау және зерттеу орталығы» заңды тұлғалар бірлестігі.
Конференцияға киберқауіпсіздіктің өзекті мәселелерін талқылау үшін Қазақстан өңірлері мен шетелден 2 мыңнан астам адам қатысты.
Бір алаңда хакерлер, ақпараттық қауіпсіздік саласының сарапшылары, IT-әзірлеушілер, мемлекеттік органдар, БАҚ өкілдері, бизнесмендер мен вендерлер жиналды.
Конференция барысында ақпарат қауіпсіздігі мен ақпараттық-коммуникациялық технологияларға қатысты өзекті мәселелер талқыланды. «Kaz'Hack,'Stan» бағдарламасында саланың осал тұстарымен таныстырған қазақстандық және шетелдік сарапшылардың баяндамалары, жетекші мамандардың шеберлік сабақтары қамтылған.
Сондай-ақ мемлекеттік саясат мәселелеріне қатысты «дөңгелек үстел» өтті. Оның шеңберінде құқықтық аспектілер мен ақпараттық қауіпсіздік және ақпараттық-коммуникациялық технологиялар саласындағы жалпы сұрақтар, конференцияға қатысушылардың тәжірибелік машықтарын арттыру мақсатында киберполигондарды пайдалану мәселелері талқыланды.