ӨСКЕМЕН. ҚазАқпарат – Өскемен қаласында электр желісінде апат болып, 1800 үй жарықсыз қалды, деп хабарлайды ҚазАқпарат тілшісі.
2 желтоқсан күні сағат 12:00 шамасында Өскемендегі бірнеше көше жарықсыз қалған.
Белгілі болғандай, бұған «Біріккен ЭнергоСервистік Компаниясы» АҚ-ның қосалқы станциясындағы апат себеп болып отыр.
«№25 станцияда апат болды. Соның салдарынан 1800-ге жуық абонент жарықсыз қалды. Қазіргі уақытта сол жерде мамандар жұмыс істеп жатыр. Электр қуаты бірнеше сағаттың ішінде қалпына келтіріледі», - делінген компанияның баспасөз қызметі таратқан ақпаратта.
Еске салсақ, бұған дейін Өскемендегі жылу электр орталығынан ақау шыққаны хабарланған болатын.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.