Мемлекеттік сатып алу порталы арқылы өткен конкурс 24 ақпан мен 3 наурыз аралығында жарияланған. Қаңғырған жануарларды аулау жұмыстарына 7,7 млн теңгеден астам қаражат қарастырылған.
Алайда конкурсқа бірде-бір ұйым қатысуға өтінім бермеді. Бұл - жүйеге өзгеріс енгізілгеннен кейін жарияланған алғашқы тендер. Осыған дейін иесіз жануарларды аулау мәселесімен облыстық ветеринария басқармасы айналысса, енді бұл өкілеттік қалалық әкімдікке беріліп отыр.
Қала әкімдігінің мәліметінше, конкурс қайта жарияланады.
- Оған жануарларды қорғау ұйымдары мен жануарлар панажайларының иелері қатысады деп үміттенеміз. Жануарларға қатыгездік танытпау мәселесін дәл осы қауымдастықтардың өкілдері үнемі көтеріп келеді. Сондықтан біз оларды бұл жұмысқа белсенді қатысуға шақырамыз, - делінген ақпаратта.
Жаңа конкурс өткізілгенге дейін Өскемендегі қаңғырған жануарлар санын реттеу мәселесі ашық күйінде қалып отыр.
Еске салсақ, осыған дейін Өскеменде бір айда 70-ке жуық адамды ит қапқаны хабарланған.