Шона Смаханұлы, Қалтай Мұхамеджанов, Оспанхан Әубәкіров, Жарасқан Әбдірәштерден қалған эпиграмма жанры Өскеменде қайта бүр жарды. «Қоңыр қалжың» деген ерекше атпен жарық көрген кітаптың авторы - Шығыс Қазақстан облыстық «Дидар» газетінің тілшісі, ақын Мұратхан Кенжеханұлы. Туындының тұсаукесеріне өңірдің зиялы қауымы, студенттер мен оқушылар қатысты.
Үш бөлімнен тұратын кітаптың алғашқы тарауында қазақ әдебиеті мен өнерінің көрнекті өкілдеріне арналған інілік әзілдер берілсе, екінші бөлімінде үзеңгілес әріптестеріне арналған әзіл-сықақтары енген. Үшінші бөлімде қоғамдағы келеңсіз құбылыстар әкім мен көлік жүргізушісі сынды түрлі сала өкілдерінің монологы арқылы жырланған.
«Эпиграмманың бәріне елімізге танымал суретшілер шарж сызды. Еркін Нұразхан, Расул Қасымов, Мерей Қайнарұлы сынды қылқалам шеберлеріне алғысым шексіз. Бұл туынды Кітап палатасына тәуелсіз Қазақстан тарихындағы тұңғыш эпиграмма жинағы ретінде тіркелді» - дейді кітап авторы.
Тұсаукесердің соңы поэзиялық кешке ұласып, жырдан шашу шашылды.