Шығыс Қазақстан облысы әкімдігінің мәліметіне сүйенсек, Өскемен қаласындағы 25-ші шағынауданда жеке тұрғын үйлер құрылысы қарқынды жүріп жатыр.
Аймақ басшысы Даниал Ахметов аталған ауданға барып, сол жұмыстардың барысымен танысты.
«Тұрғын үй иелеріне құрылыстың төрт түрлі жобасы ұсынылып отыр. Бұл - объектілерді салу кезіндегі міндетті шарт. Әр үй заманауи үлгіде салынбақ. Арнайы жайлы пештер орнатылып, шаруашылық жүргізуге тиесілі жер аумағы да болады. Сондықтан халық арасында жоғары сұранысқа ие болатынына сенімдімін», - деді әкім.
Сондай-ақ Даниал Ахметов Жібек маталар комбинаты ықшамауданындағы жол айрығының жобасымен танысты. Бұл жерде бес жол түйісетін болады.
«Бұдан бөлек, Самар тасжолына шығатын Базовая көшесін кеңейту көзделген. Нәтижесінде оның өткізу қабілеті екі есе артпақ. Бұл шаралар жолдардағы көлік кептелісін айтарлықтай төмендетуге мүмкіндік береді. Жауапты мамандарға Есенберлин көшесіндегі нөсер кәрізін орнатуды және барлық инфрақұрылымдық жұмыстарды аяқтауды тапсырдым. Астана көшесінің жүру бөлігін кеңейту де жоспарлануда. Бірақ ол үшін алдымен халықтың қатысуымен қоғамдық тыңдаулар өтуі тиіс. Аврора және Пограничная көшелері Нұрсұлтан Назарбаев даңғылына дейін кеңейтіледі. Бұл Понтонный көпірін тиімдірек пайдалануға және ауыр техниканы қала сыртына шығаруға мүмкіндік бермек. Сонымен қатар жол құрылысшылары Мызы көшесін кеңейту туралы ұсыныс білдірді. Оны қарастыруға дайынбыз, өйткені бұл аймақта жол кептелісі жиі болатыны белгілі», - деді өңір басшысы.