ӨСКЕМЕН. ҚазАқпарат – Өскемен қаласындағы кәсіпорында шыққан ірі өрт сөндірілді, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, Путевая көшесінде орналасқан ЖШС-ның ангарында өрт шыққан. Оқиға орнына өрт сөндірушілер шұғыл келіп жетті. Тілсіз жау ангар ішіндегі жабдықтарға зақым келтірген.
«Құтқарушылар жалпы ауданы 290 шаршы метрге жеткен қызыл жалынды ауыздықтады. Алдын ала мәлімет бойынша өрттің шығуына – электр жабдықтарының апаттық режимде жұмыс істеуі себеп болған», - деп хабарлады ведомство өкілдері.
Айта кетейік, өртті сөндіруге жеке құрамнан 32 адам мен 11 техника жұмылдырылды.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.