АСТАНА. KAZINFORM — Вунгтауда (Вьетнам) күрес түрлерінен жастар арасында өтіп жатқан Азия чемпионатында қазақстандық Зейнеп Баянова жүлдеге ілікті.
Батысқазақстандық балуан 23 жасқа дейінгілер арасында 53 келіге дейінгі салмақта қола жүлдегер атанды.
Қазақстан күрес федерациясынан мәлім еткеніндей, З.Баянова қола медаль үшін бәсекеде өзбекстандық Дилшода Матназарованы айқын басымдылықпен ұтты — 13:1.
Бұл — Зейнептің биылғы Азия біріншілігіндегі екінші қоласы. Осыған дейін ол Иордания астанасы Амманда ересектер арасында өткен құрлықтық бәсекеде қола жүлдегерлер қатарынан көрінген еді. 20 жастағы балуанның жеке бапкері — Мұсабек Нарегеев.
Еске сала кетейік, бұдан бұрын Зейнеп Баянованың арманы олимп шыңын бағындыру екендігі туралы айтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).