НҰР-СҰЛТАН. ҚазАқпарат - Қазақстандық Отгонцэцэг Галбадрах Түркияның Анталия қаласында өтіп жатқан Гран-при турнирінің күміс жүлдегері атанды, деп хабарлайды ҚазАқпарат тілшісі.
Қазақстандық спортшы 48 кг салмақта финалда косоволық Дистрия Красникимен татамиге шықты. Косоволыққа қарағанда, Рио Олимпиадасының қола жүлдегері, әлемдік додаларда талай рет топ жарған О.Галбадрахтың атақ-даңқы әлдеқайда жоғары еді.
Бұдан төрт жыл бұрын қарсыластар бір рет кездесіп, онда Красники жеңген екен. Қарсыластардың бір-бірін жақсы білетіні тартысты белдесу барысында көрінді. Жекпе-жек бітуге санаулы секундтар қалғанда, Галбадрах алға ұмтылып, Дистрияның әдісіне түсіп қалды. Сөйтіп Дистрия Красники таза жеңіп кетті.
Еске сала кетейік, бұдан бұрын Елдос Сметов бастаған дзюдошылардың Гран-при турниріне қатысатынын, Отгонцэцэг Галбадрахтың финалға жолдама алғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).