Өткен жылы электронды БАҚ-тың қазақтілді контенті 13%-ға өсті
Бұл туралы ranking.kz хабарлады.
Тәуелсіздік жылдары қазақтілді тұрғындар саны 1991 жылғы 37%-дан 2015 жылы 76,3% -ға дейін артты. Ал 2016 жылдың соңына қарай бұл көрсеткіш 82,3%-ды құрады. Сонымен қатар тілді үйреніп жатқандар саны да артып келеді, 2015 жылы бұл көрсеткіш 22,3%-ға көбейді. Орыстілді тұрғындары санына келсек, 2015 жылға қарай олардың үлесі 0,6%-ға қысқарып, 89,4%-ды құрады.
Тілдерді дамыту және қолданудың мемлекеттік бағдарламасына сәйкес, 2025 жылға қарай қазақ тілін білетіндер саны басым болады деп күтілуде: тұрғындардың 95%-ы қазақ тілінде, 90 %-ы орыс тілінде еркін сөйлейтін болады.
Мемлекеттік тілдің статусы білім беру жүйесінде нығаяды. Қазақ тілін меңгерген мектеп түлектерінің үлесі 2016 жылы 68%-дан 70%-ға дейін өсті. Бүгінгі таңда елімізде 3,8 мың мектеп қазақ тілінде білім береді, бұл жалпы мектептер санының 53%-ы. 2015 жылы ол көрсеткіш 51%, ал 1991 жылы 32% деңгейінде болды.
2016 жылы электронды БАҚ-тағы қазақтілді контенттің үлесі 12,7%-ға өсіп, 84 %-ды құрады. Тек орыс тіліндегі контент көлемі 10,8%-ға қысқарып, жыл соңында 16%-ды құрады. Дегенмен жалпы құрылымдағы электронды БАҚ үлесі 16%-ды құрайды. Қалғаны баспа БАҚ үлесінде, онда қазақтілді контент көлемі 50%-дан астам.
2016 жылдың соңында 2,6 мың бұқаралық ақпарат құралы тіркелген (2015 жылға +11%), оның ішінде 23% - мемлекеттік. Мемлекеттік БАҚ-та ақпарат ағынының 71%-ы қазақ тілінде, бір жыл бұрын бұл көрсеткіш 60% деңгейінде болатын. Дегенмен ҚР Мәдениет және спорт министрлігінің жүргізген сауалнамасына сәйкес, оқырмандар қазақтілді мемлекеттік БАҚ-ты тартымсыз әрі өзекті емес деп есептейді, сонымен қатар ақпараттық емес және мазмұнсыз сайттар көп деген ой білдірген.
Қазақстандықтар жаһандану процесінің ықпалымен ағылшын тілін белсенді меңгеріп жатыр. Егер 1991 жылы ағылшын тілін меңгерген тұрғындар үлесі 2%-ды ғана құраған болса, 2012 жылы бұл көрсеткіш 11,6%-ға дейін артты, ал бүгінгі таңда олардың үлесі 23,7%-ды құрап отыр.
Елімізде үш тілді білудің пайыздық көрсеткіші 2015 жылы 16 % болса, 2016 жылдың аяғында 20 %-ға дейін өскен. Естеріңізге сала кетейік, үш тұғырлы тіл принципі 2016 жылы ҚР Білім және ғылым министрлігінің жүйесіне енген.