ОРАЛ. ҚазАқпарат - Орал қалалық сотының үкімімен Өзбекстан азаматтарының Ресей аумағына өтуін заңсыз ұйымдастырған И.Шведюк ҚР ҚК 394-бабы 2-бөліміне сәйкес айыпты деп танылып, оның екі жылға бас бостандығы шектелді, деп хабарлайды ҚазАқпарат тілшісі.
БҚО прокуратурасының баспасөз қызметінен түскен мәліметке қарағанда, аталған тұрғын тергеу барысында анықталмаған адамдармен сөз байласып, биылғы 18 сәуір күні Өзбекстан азаматтары Т.Иноятов, З.Тәжібаева, Т.Ергашев, Ш.Тошмирзоев және А.Усмоновты Зеленов ауданындағы Қазақстан шекарасына дейін жеткізген. Содан кейін Қазақстан азаматтары И.Ермешев пен М.Дьяконов аталған адамдарды Орынбор облысы Первомай ауданына шекара арқылы өткізген. Алайда 19 сәуір күні олардың барлығы Ресей федеральдық қауіпсіздік қызметі шекара жасағы қызметкерлерінің қолына түскен.
Сот үкім шығарған кезде И.Шведюктің орта дәрежелі деп бағаланған қылмысқа бірінші рет барғандығын ескерді.
Сот үкімі заңды күшіне енді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).