Бұл туралы Өзбекстандағы Қазақстан елшісі Ерік Өтембаевтың Өзбекстан әділет министрі Русланбек Давлетовпен кездесуі барысында айтылды. Әңгімелесу барысында екі елдің келісімдік-құқықтық базасын одан әрі кеңейту және нығайту, атап айтқанда, азаматтар мен заңды тұлғалардың құқықтары мен мүдделерін қорғау, азаматтарға заңдық мәселелер бойынша жан-жақты құқықтық көмек көрсету, сондай-ақ мемлекеттік органдар тарапынан мемлекеттік қызметтерді көрсету жүйесін жетілдіру мәселелері бойынша пікір алмасылды.
Өзбекстандық тарап ҚР-мен өзара қарым-қатынастарды дамытудың маңыздылығын атап өте отырып, еліміздің түрлі мемлекеттік қызмет көрсетудегі тәжірибесіне үлкен қызығушылық танытты. Осыған байланысты республиканың әділет министрлігі осы жылдың соңына дейін төрт елге - Қазақстан Әзербайжан, Грузия және Ресейге мемлекеттік қызмет көрсету саласын зерттеу үшін сарапшылар тобын жібереді.
Бұдан бөлек Русланбек Давлетов әділет министрлігінің делегациясымен Шымкент қаласындағы ХҚКО-лардың жұмысымен танысу үшін ОҚО-ға шақырылды.