ТАШКЕНТ. KAZINFORM — Өзбекстанның Қорғаныс министрі Шухрат Халмухамедов пен Түркияның Ұлттық қорғаныс министрі Яшар Гюлер Анкарада 2026 жылға арналған әскери ынтымақтастық келісіміне қол қойды, деп хабарлайды Kazinform агенттігінің меншікті тілшісі.
Ведомстводан мәлім еткендей, тараптар шағын құрамда кездесіп, өңірлік қауіпсіздік, қорғаныс өнеркәсібін дамыту және екі ел қарулы күштерінің арасындағы іс-қимылды үйлестіру мәселелерін талқылады.
2026 жылға арналған ынтымақтастық келісімі әскери бөлімшелердің бірлескен оқу-жаттығуын ұйымдастыру, тәжірибе алмасу, сондай-ақ әскери медицинаны дамыту жоспарларын қамтиды.
Еске салайық, Өзбекстан билігі елдің Қорғаныс доктринасына өзгеріс енгізуге ниетті. Сондай-ақ, ел үкіметі Ұлттық қауіпсіздік тұжырымдамасын қайта қарауды жоспарлап отыр.
Әлихан Асқар
2018 жылы А. Байтұрсынов атындағы Қостанай мемлекеттік университетін журналистика мамандығы бойынша тәмамдаған. Әр жылдары облыстық Qostanai, республикалық Astana TV, «Жетінші арна» телеарналарындағы бағдарлама және жаңалықтар бөлімінде қызмет етті. «ҚР Президенті телерадиокешенінде» 2022 жылдың мамырынан бастап еңбек етеді. 2023 жылдан бері Kazinform агенттігінің Өзбекстандағы меншікті тілшісі.