ТАШКЕНТ. KAZINFORM — Енді Өзбекстанда лицензиясыз және медициналық білімі жоқ емшілерге әкімшілік жаза қолданыла бастайды, деп хабарлайды Kazinform агенттігінің Ташкенттегі меншікті тілшісі Әлихан Асқар.
ӨР Олий Мажлиси Сенатының баспасөз қызметінен мәлім еткендей, сенаторлар комитет отырысында «Өзбекстанның кейбір заңнамалық актілеріне толықтырулар мен өзгерістер енгізу туралы» заң жобасын талқылап, кейбір ұсыныстарды бекітті.
Атап айтқанда, енді медициналық білімі мен лицензиясы жоқ емшілер азаматтарды диагностикадан өткізсе немесе емдесе, онда олар әкімшілік жауапқа тартылады.
Сонымен қатар, пайда табу мақсатында ғылыми дәлелденбеген, тексерілмеген халықтық медицинаның әдіс-тәсілдерін насихаттағаны үшін де әкімшілік жаза қолданылмақ.
Әлихан Асқар
2018 жылы А. Байтұрсынов атындағы Қостанай мемлекеттік университетін журналистика мамандығы бойынша тәмамдаған. Әр жылдары облыстық Qostanai, республикалық Astana TV, «Жетінші арна» телеарналарындағы бағдарлама және жаңалықтар бөлімінде қызмет етті. «ҚР Президенті телерадиокешенінде» 2022 жылдың мамырынан бастап еңбек етеді. 2023 жылдан бері Kazinform агенттігінің Өзбекстандағы меншікті тілшісі.