ТАШКЕНТ. KAZINFORM – Биыл қаңтар-мамыр айлары аралығында өзбекстандықтар жалпы сомасы 25,7 млрд доллар шетел валютасын сатып алды. Бұл 2025 жылдың сәйкес кезеңімен салыстырғанда 20,1% көп, деп хабарлайды Kazinform агенттігінің Ташкенттегі меншікті тілшісі.
Орталық банктің мәліметінше, әсіресе, бизнес тарапынан сұраныс артып келеді. Бес айдың ішінде заңды тұлғалар - 20,2 млрд доллар, ал тұрғындар 5,5 млрд доллар сатып алған.
Сатып алумен қатар шетел валютасын сату көрсеткіштері де өсті. Атап айтқанда, маусым айының басында компаниялар мен өзбекстандықтар 22,3 млрд долларды банктерге өткізген. Бұл былтырмен салыстырғанда 5 млрд долларға артық.
Еске салайық, бір апта бұрын Өзбекстан Орталық банкінің Басқармасы базалық мөлшерлемені жылдық 14% деңгейінде сақтап қалу шешімін қабылдады.
Өзбекстан президенті Шавкат Мирзиёевтің айтуынша, биыл елдің ішкі жалпы өнім көлемі 180 млрд доллардан асады.
Әлихан Асқар
2018 жылы А. Байтұрсынов атындағы Қостанай мемлекеттік университетін журналистика мамандығы бойынша тәмамдаған. Әр жылдары облыстық Qostanai, республикалық Astana TV, «Жетінші арна» телеарналарындағы бағдарлама және жаңалықтар бөлімінде қызмет етті. «ҚР Президенті телерадиокешенінде» 2022 жылдың мамырынан бастап еңбек етеді. 2023 жылдан бері Kazinform агенттігінің Өзбекстандағы меншікті тілшісі.