АСТАНА. KAZINFORM - Астанада өтіп жатқан пара дзюдодан әлем чемпионатында бүгін, 14 мамырда қазақстандық екі дзюдошы қола жүлде алды.
Дүбірлі додада Ерлан Өтепов (95 келіден жоғары) J1 санаты бойынша 3-орын үшін таласуда мексикалық Оскар Агуэрреден басым түсіп, қола жүлдеге қол созды.
Сондай-ақ сол санатта аталған салмақта Бағланбек Оңалбек моңғол балуаны Ерденебилег Лхагвадорждан айласын асырып, үздік үштікті түйіндеді.
Енді аталған салмақта Жұрқамырза Шүкірбеков финалда күреседі.
Бүгін, 14 мамырда ел құрамасынан Аяла Мереке (70 келі) күміс медаль алды.
Еске салсақ, әлем чемпионатында 13 мамырда отандастарымыз 1 алтын, 1 күміс және 3 қола жүлде еншіледі.
J2 санатынан Бексұлтан Құлмырза (81 келі) алтын алса, Ғалымжан Смағұлұлы (81 келі) күміс жүлдеге қол жеткізді.
Аталған санат бойынша Ерғали Шамей (81 келі), Айназ Құралова (46 келі) қола жүлдегер болды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.