АСТАНА. KAZINFORM — Қытайдың Ханчжоу қаласында волейболды отырып ойнаудан әлем чемпионатында Қазақстан құрамасы С тобында екінші кездесуін өткізді.
Бауыржан Тахауовтың шәкірттері бұл жолы әлемдегі үздіктердің бірі — Бразилия құрамасымен шеберлік байқасты.
Бірінші партияда бразилиялықтар басым болды — 25:20.
Екінші сетте Пердебай Намұратов, Ерік Қасқабаев, Бауыржан Сартаев, Ерлан Битеміров, Ерболат Алтаев сынды қазақстандықтар сәтті ойын өрнегін көрсетті — 26:24.
Қазақстандық параволейболшылар үшінші сетте де бастапқыда алға шыққанымен, сол басымдылықты ұстап тұра алмады — 17:25. Бразилиялықтар төртінші партияда алға тым ұзап кетіп, матчты жеңіспен аяқтады — 25:15.
Қорытынды есеп — 3:1, Бразилияның пайдасында.
Ертең Қазақстан құрамасы Иракпен алаңға шығады. Иракты жеңген жағдайда ширек финалға жолдама алады.
Еске сала кетейік, бұдан бұрын қазақстандық параволейболшылардың әлем чемпионатында бақ сынайтынын жазған едік.
Сондай-ақ қазақстандық параволейболшылар әлем чемпионатын айқын жеңіспен бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).