ПАРИЖ. KAZINFORM – Франция астанасы Париж қаласында өтіп жатқан Олимпиада ойындарында бүгін грек-рим күресінен 87 келі салмақта сынға түсетін балуанымыз Нұрсұлтан Тұрсыновтың қарсыласы белгілі болды.
Нақтырақ айтсақ, грек-рим күресінен Ұлттық құрама спортшысы Нұрсұлтан Тұрсынов Париж Олимпиадасының 1/8 кезеңінде мысырлық балуан Мохамед Мұстафа Метваллимен күреседі.
Бұл белдесу жеңімпазы Жан Беленюк (Украина) немесе қытайлық спортшымен сынға түседі.
Мысырлық палуан - Африка ойындарының қола жүлдегері, Африка чемпионы, Токио Олимпиадасының қатысушысы.
Нұрсұлтан Тұрсынов Азия чемпионы және 2 дүркін күміс жүлдегері.
Айта кетейік, бүгін 77 келіде ел намысын қорғаған Демеу Жадыраев Париж Олимпиадасының жартылай финалында Әзірбайжан өкілі Санан Сулеймановты айқын басымдықпен жеңіп, финалға шықты.
Күнсұлтан Отарбай
Еуразия Ұлттық университетінің түлегі. Республикалық «Қазақ спорты», «Sport» газеттерінде қызмет атқарған.
2014 жылғы Сочи, 2016 жылғы Рио-Де Жанейро, 2017 жылғы Инчхон және 2024 жылғы Париж Олимпиадасында, сонымен қатар бір қанша Қысқы және Жазғы Азия ойындарынан, әлем біріншіліктеріне барып тікелей хабар таратқан журналист.
Сейдақмет Бердіқұлов атындағы арнайы сыйлықтың лауреаты.