ПАРИЖ. KAZINFORM — Швециялық сырықпен секіруші, екі дүркін әлем чемпионы Арман Дюплантис Олимпиада тарихына өз есімін алтын әріптермен жазды.
Сырықпен секіру сайысында америкалық Сэм Кендрикс (5,95 метр) күміс, грекиялық Эммануил Каралис (5,90 метр) қола жүлдегер атанса, Арманға алтын алу үшін 6 метрді бағындыру жеткілікті болды.
Бұдан кейін А.Дюплантис жалғыз өзі қалып, рекорд жасауға кірісті. Алдымен ол 6 метр 10 сантиметр биіктікке секіріп, Олимпиада рекордын (бұрынғысы – 6,03 м) жаңартты. Сосын биыл өзі сәуірде жасаған әлем рекордын (6,24 м) бағындыруға тырысты. Арман стадион толы көрерменнің қолдауымен үшінші әрекетінен кейін бұл нәтижеге де қол жеткізді – 6,25 метр!
Бұдан төрт жыл бұрын А.Дюплантис 20 жасында атақты кеңестік сырықпен секіруші Сергей Бубканың 26 жыл тұрған әлемдік рекордын (6,14 м) бір сантиметрге (6,15 м) жаңартқан еді.
Еске сала кетейік, бұдан бұрын 51 жастағы түрік мергенінің болашақта Олимпиада алтынын алғысы келетінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).