Аталған жарыста Қазақстан құрамасы Бразилияға 4:2 есебімен жол берді. Белдесулерден кейін Kazinform тілшісі Әбиба Әбужақыновамен тілдесті.
– Әбиба, аралас командалық сайыста үш қыз шығып, үшеуіңіз де жеңіліп қалдыңыздар. Қарсыластарыңыз өте мықты болды ма?
– Әрине, мықты командамен сынға түстік. Қазақстан дзюдодан Олимпиада тарихында алғаш рет командалық жарыста бақ сынап тұр. Сондай-ақ лицензияны толық құраммен алмадық қой. Сондықтан көпшілігіміз өзіміздің салмағымыздан жоғары балуандармен белдестік.
– Егер қыздарымыз жеңіске жеткенде келесі айналымға өте алар ма едік?
– Бәрі мүмкін еді. Өкінішке қарай үшеуіміз де жеңілдік. Жігіттердің екеуі жеңіске жетті. Барымызды салып белдестік. Алайда жүлдеге қол соза алмадық. Егер толық құраммен келгенде басқаша болар ма еді.
– Осымен қазақ дзюдошылары Олимпиада ойындарын аяқтады. Аталған додадағы көрсеткіштеріңізге разы болдыңыздар ма?
– Әрине, жігіттеріміз жекелей сында 1 алтын, 1 қола медаль иеленді. Бір спорт түрінен алғанда жақсы нәтиже. Жүлдегер атанған жігіттерімізді шын жүректен құттықтаймын. Бұл біздің дзюдошылардың ортақ жүлдесі деп есептеймін.
– Ал, өзіңіз жүлдеге «сынық сүйем» қалғанда сүріндіңіз. Қазіргі көңіл күйіңіз қалай?
– Парижге жүлде аламын деп келгенім рас. Мәңгі есімнен кетпейтін өкініш қалды. Мойындау керек, ақталмаймын, жеңіліп қалдым. Жанкүйерлерді қуанта алмағаным үшін тағы бір мәрте кешірім сұраймын. Ең бастысы – бұл Олимпиада маған ең үлкен тәжірибе сыйлады. Мен мұндай додаға бірінші рет қатысып тұрмын. Париж маған Олимпиаданың қандай жарыс екенін ұғындырды.
– Елге қашан қайтасыздар?
– Бұйырса, ертең жолға шығып, 5 тамыз күні елге жетеміз деп жоспарлап отырмыз.
– Әңгімеңізге рахмет. Алдағы жарыстарда сәттілік тілейміз.