АСТАНА. KAZINFORM - Таиланд астанасы Бангкок қаласында өтіп жатқан бокстан Олимпиадаға іріктеу турнирінде Назым Қызайбай (50 келі) ширек финалға шықты.
50 келі салмақ дәрежесінле бақ сынаған қазақстандық боксшы 1/8 финалда ұлыбританиялық Саванна Стублейді жеңді.
Жекпе-жек барысында Назым бір бас жоғары болды. Қарсыласына көбірек соққы жұмсады. Нәтижесінде төрешілер бірауыздан Назымды бұл кездесудің жеңімпазы деп таныды. Осылайша қарсыласынан 5:0 есебімен басым түскен ол ширек финалға жолдама алды.
Енді ел құрамасынан 18:45-те Мұхаммедсабыр Базарбайұлы (63.5 келі) бесінші жолдама үшін колумбиялық Хосе Мануэль Виафарамен қолғап түйістіреді.
Сондай-ақ бүгін Валентина Хальзова (75 келі) 1/4 финалға шықты.
Таиландтағы іріктеу турнирінде Ұлжан Сәрсенбек (54 келі), Римма Волосенко (60 келі) мен Наталья Богданова (66 келі) жарысты орта жолдан аяқтады.
Қазір Қазақстан құрамасы қоржынында Париж Олимпиадасына ерлерде 6, әйелдерде 1 жолдама бар.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.