Париж паралимпиадасында жеңіл атлетикадан ел намысын 4 спортшы қорғайды

АСТАНА. KAZINFORM — Париж паралимпиада ойындарында жеңіл атлетикадан Қазақстан намысын кімдердің қорғайтыны анықталды.

Дене мүмкіндіктері шектеулі тұлғаларға арналған спорттық даярлау орталығынан мәлім еткендей, Парижге жеңіл атлетикадан 4 пара спортшы барады.

Атап айтқанда, Салтанат Әбілқасымқызы, Дастан Мұқашбеков, Жоламан Еламан және Гүлбақыт Қайыржанова жарыс жолына шығады. 

2024 жылғы Париж Паралимпиада ойындары 28 тамыз - 8 қыркүйек аралығында өтеді. Ойындардың басталуына 30 күн қалды.

Еске сала кетейік, бұдан бұрын қазақстандық парадзюдошылардың 10 лицензияға ие болғанын жазған едік.