Парижде криптовалюталық миллионердің қызы қарақшыларға тап болды

АСТАНА. KAZINFORM — Серігі және кішкентай баласымен серуендеп жүрген әйелге таңғы сегіз жарым шамасында Париждің 11-ші аймағындағы көшелердің бірінде шабуыл жасалған, деп хабарлайды Euronews.

Кадрларда бетін бүркеген үш шабуылдаушы әйелді ақ фургонға күштеп отырғызбақ болғаны, оларға серігі мен өтіп бара жатқан адамдар қарсылық танытқаны көрсетілген.

Өтіп бара жатқан адам шабуылдаушылардың бірінің жерге құлаған тапаншасын алса, басқа адам оларды өрт сөндіргішпен ұрмақ болған. Сәтсіздікке тап болған қарақшылар тез кетіп қалды. 

Соңғы айларда Франция мен Еуропадағы криптовалюта бизнесіндегі танымал тұлғаларды және олардың отбасы мүшелерін ұрлау немесе ұрлауға әрекет жасау оқиғалары көбейіп кеткені хабарланып отыр. 

Мамыр айының басында криптовалюталық миллионерлердің бірінің әкесі Париждің 14-ші аймағында итімен серуендеу кезінде ұрланып, үш күн тұтқында болды. 
Ұрлағандар оны босату үшін қомақты төлем талап етіп, ұлына оның кесілген саусағын түсірген бейнежазбаны жіберген, деп хабарлады француздық Franceinfo телекомпаниясы.

Осы арада қаңтарда француздық Ledger криптовалюталық компаниясының негізін қалаушы 36 жастағы Дэвид Балланд пен оның серіктесі Францияның солтүстігінде орналасқан Мерео шағын коммунасындағы үйінен ұрланған болатын. 

Ledger негізін қалаушы Эрик Ларчевек криптовалютадағы төлем сұранысымен бірге Балландтың кесілген саусағы туралы бейнені алғаннан кейін дабыл қаққан.
Сондай-ақ криптовалютамен айналысатындар мен олардың туыстары Испания мен Бельгияда жақында ұрлау әрекеттеріне тап болғаны хабарланды.

Бұған дейін АҚШ президенті Дональд Трамп елдегі алғашқы цифрлық активтердің мемлекеттік резервін құру туралы жарлыққа қол қойғанын жазған болатынбыз. 

Сондай-ақ Қазақстан Ұлттық банкі «стейблкоин» деген атаумен өз цифрлық активін шығаруды жоспарлап отырғанын хабарладық.